İndoneziya sahillərində 7,4 maqnitudalı zəlzələ | Sunami xəbərdarlığı edildi

Aprelin 2-də İndoneziya sahillərində 7,4 maqnitudalı zəlzələ qeydə alınıb.

Bu barədə Avropa-Aralıq dənizi Seysmoloji Mərkəzi məlumat yayıb.

Bildirilir ki, zəlzələnin episentri təxminən 451 min əhalisi olan Şimali Sulavesi vilayətində yerləşən Manado şəhərindən 163 kilometr şərqdə, ocağı 35 kilometr dərinlikdə yerləşib. Zəlzələdən sonra baş verən sunaminin hündürlüyü 75 santimetrə çatıb.

Daha əvvəl ABŞ-nin sunami xəbərdarlığı sistemi sunami dalğalarının Yaponiya, Malayziya, Filippin və digər yaxın ölkələrin sahillərinə çata biləcəyi barədə xəbərdarlıq etmişdi.

Hadisə nəticəsində 1 nəfərin öldüyü təsdiqlənib. Hökumət tərəfindən dağıntı olan ərazilərdə axtarış-xilasetmə işlərinə başlanılıb və dəyən ziyanın ölçülməsi prosesi həyata keçirilir.