İsrail Livanda hərbi əməliyyatları genişləndirir

İsrail Ordusu Livanın cənubunda hava hücumlarını gücləndirərək “Hizbullah”ın sərhəd bölgəsində hərbi mövcudluğunu artırmasının qarşısını almağa çalışdığını bildirib.

Davam edən hücumlar çərçivəsində bir binaya zərbə endirilib və nəticədə güclü partlayış baş verib. Hadisə zamanı azı bir nəfərin öldüyü bildirilir.

Qeyd edək ki, İsrail tərəfi “Hizbullah”ı ötən il ABŞ-nin vasitəçiliyi ilə əldə olunan atəşkəsdən sonra yenidən silahlanmağa çalışmaqda ittiham edir. Qrup isə İsrail sərhədinə yaxın ərazilərdəki hərbi mövqelərini boşaltdığını və bölgəyə Livan Ordusunun yerləşdirilməsi tələblərinə əməl etdiyini bildirir.

İsrail Ordusu dörd kənddə “Hizbullah”ın hərbi infrastrukturu olduğunu və binaları hədəf alacağını bəyan edib. Bəyanatdan sonra İsrail tərəfi sakinlərin həmin əraziləri tərk etdiyini də qeyd edib.