İsrail PUA hücumu fonunda Netanyahu ordusuna qəti tapşırıq verdi

İsrail ərazisinə davam edən pilotsuz uçuş aparatı ilə hücumları fonunda Livandakı "Hizbullah" hədəflərinə hərbi təzyiqi artıracaq.

Bu barədə İsrailin Baş naziri Benyamin Netanyahu özünün "Telegram" kanalında yayımladığı videomüraciətdə bildirib.

İsrail hökuməti başçısının sözlərinə görə, ölkə "Hizbullah"la müharibə vəziyyətindədir. Onun sözlərinə görə, İsrail Ordusu cəmi bir neçə həftə ərzində şiə milislərinin 600-dən çox üzvünü öldürüb.

"Biz hücumdan əl çəkmirik. Əksinə, mən hücumu daha da gücləndirmək əmrini verdim. Biz onları vuracağıq. Bəli, onlar bizə dronlar atırlar. Bununla məşğul olan xüsusi komandamız var və biz bu problemi həll edəcəyik", – deyə o bildirib.

Netanyahu həmçinin İsrail ərazisinə buraxılan dronlar problemi ilə xüsusi bir qrupun məşğul olduğunu bildirib.