Peskov Putinlə Şaraa arasındakı danışıqlarla bağlı açıqlama verdi

Rusiya Prezidentinin mətbuat katibi Dmitri Peskov Prezident Vladimir Putinlə Suriya lideri Əhməd Əl Şaraa arasında keçirilən danışıqlarla bağlı açıqlama verib.

Onun sözlərinə görə, görüş zamanı Suriyanın sabiq prezidenti Bəşər Əsədin ekstradisiyası məsələsi müzakirə edilməyib.

Peskov bildirib ki, danışıqlarda əsas diqqət Rusiya ilə Suriya arasında ticarət-iqtisadi əməkdaşlığın inkişafına yönəlib. Eyni zamanda Rusiyanın Suriyadakı hərbi bazaları məsələsi də görüşün gündəliyində yer alıb.

Peskov qeyd edib ki, Rusiya ABŞ-dən Strateji Hücum Silahlarının Məhdudlaşdırılması üzrə Müqavilə ilə bağlı irəli sürülən təşəbbüslərə cavab gözləməkdə davam edir, lakin hələlik rəsmi reaksiya alınmayıb.

O əlavə edib ki, Almaniyanın Ukrayna ilə bağlı danışıqlarda vasitəçi qismində iştirakı hazırda gündəmdə deyil. Əbu-Dabidə keçirilməsi planlaşdırılan görüşün formatı isə dialoqun bərpa ediləcəyi tarixə qədər razılaşdırılacaq.

Peskovun sözlərinə görə, Birləşmiş Ərəb Əmirlikləri hazırda Rusiyanın Ərəb dünyasında əsas ticarət tərəfdaşıdır.

Kreml sözçüsü Ukrayna ilə enerji sahəsində atəşkəsin əldə olunması və ya bu istiqamətdə aparılan mümkün danışıqlarla bağlı yayılan məlumatları şərh etməkdən imtina edib. Eyni zamanda Peskov bildirib ki, Əbu-Dabidə ekspertlər səviyyəsində keçiriləcək növbəti danışıqlar raundu zərurət yaranacağı təqdirdə bir gündən artıq davam edə bilər.