Serbiya Prezidenti qərardan sonra sabitliyin qorunmasını ölkəsi üçün əsas prioritet adlandırıb

Serbiya Prezidenti Aleksandar Vuçiç Haaqadakı Kosovo üzrə Xüsusi Palataların Məhkəmə Heyətinin keçmiş Kosovo Azadlıq Ordusunun sabiq rəhbərləri barədə çıxardığı hökmə münasibət bildirib.

O, Haaqadakı prosesi dünyadakı ikiüzlülüyün təzahürü kimi qiymətləndirib. Vuçiç dünyada Serbiyaya münasibətdə "ikili standartların" və "böyük ikiüzlülüyün" olduğunu vurğulayıb.

Onun sözlərinə görə, hökmlərin qanuni qüvvəyə minib-minməməsindən asılı olmayaraq serblər həmişə cinayətkar, digərləri isə azadlıq mübarizləri və qəhrəmanlar kimi təqdim olunacaq.

Vuçiç qeyd edib ki, Serbiya öz qurbanları ilə bağlı xatirə mədəniyyətinin inkişafını davam etdirməlidir.

"Əgər biz öz qurbanlarımızı xatırlamasaq, onları heç vaxt heç kim anmayacaq", – deyə A.Vuçiç vurğulayıb.