Təbriz şəhəri bombalandı | Sənaye müəssisələri hədəfdə - Baku TV

İsrail Hərbi Hava Qüvvələri Xəzər dənizi yaxınlığında İranın hava hücumundan müdafiə sistemlərinə zərbə endirib.

Bu barədə İsrail Ordusu məlumat yayıb.

Bildirib ki, İran üzərində hava üstünlüyünü genişləndirmək məqsədilə həyata keçirilən əməliyyatlar çərçivəsində ölkənin şimalında, Xəzər dənizi yaxınlığında yerləşən hava müdafiə sistemlərinə zərbə endirilib.

ABŞ və İsrail Ordusu həmçinin Təbriz şəhərinə hava hücumu həyata keçirib. Şərqi Azərbaycanın Böhranların İdarə Edilməsi İdarəsinin baş direktoru Məcid Fərşinin sözlərinə görə, Neft-Kimya Müəssisəsi bombalanıb. Nəticədə obyektə ziyan dəyib, amma bu, benzin istehsalını dayandırmayıb.

"Bu hücumlarda Təbrizin 2 mülki nöqtəsi, o cümlədən Təbriz hava limanının idarəetmə qülləsi və uçuş-enmə zolağı, eləcə də Təbriz Neft-Kimya Müəssisəsi hədəf alınıb. Xoşbəxtlikdən bu iki hücumda ölən və yaralanan olmayıb", – deyə Məcid Fərşi qeyd edib.

O vurğulayıb ki, hücumdan sonra təhlükəsizlik, yanğınsöndürmə, xilasetmə və əməliyyat qrupları dərhal hadisə yerinə cəlb olunub və fövqəladə vəziyyətin idarə edilməsi üçün lazımi tədbirlər görülüb.