İranlının toruna düşüb, narkokuryerlik etdilər

Sabirabad Rayon Polis Şöbəsinin əməkdaşları narkotik satışında şübhəli bilinən rayon sakinləri – Fərid Muradov və Aydın Eyvazovu saxlayıb.

Həmin şəxslərin üzərinə və əllərində olan çantaya baxış zamanı 3 ədəd polietilen torbada qablaşdırılmış və təmiz çəkisi 13 kiloqramdan çox olan marixuana aşkar edilərək götürülüb.

Məlum olub ki, Fərid Muradov və Aydın Eyvazov qaçaqmalçılıq yolu ilə Azərbaycana narkotik vasitələr göndərən iranlı narkotacirlə sosial şəbəkələr vasitəsilə əlaqə yaradaraq 2 500 manat müqabilində narkokuryerlik etməyə razılaşıblar. Əvvəlcədən deyilən ərazidən narkotik vasitəni götürüb təyin olunan yerə aparmaq istəyən zaman isə onlar polis əməkdaşları tərəfindən yaxalanıblar.

Faktla bağlı Sabirabad RPŞ-nin İstintaq Bölməsində cinayət işi başlanılıb, saxlanılan şəxslər barəsində rayon məhkəməsinin qərarı ilə həbs qətimkan tədbiri seçilib.