Külli miqdarda dələduzluq edən Asif Əsədullazadə hakim qarşısında

Bakıda vətəndaşı aldadaraq dələduzluq yolu ilə külli miqdarda zərər vurmaqda təqsirləndirilən Asif Əsədullazadənin cinayət işi üzrə məhkəmənin baxış iclası keçirilib.

Bakı Ağır Cinayətlər Məhkəməsinin hakimi Elnur Nuriyevin sədrliyi ilə baş tutan prosesdə şahidlər dindirilib.

İttiham aktında göstərilib ki, təqsirləndirilən Asif Əsədullazadə zərərçəkmiş Vüqar Məmmədovun etibarından sui-istifadə edərək onu özünün cəmiyyətdə yüksək nüfuza və geniş əlaqələrə malik şəxs olmasına inandırıb.

Bildirib ki, guya müxtəlif dövlət orqanlarında işləyən yüksək vəzifəli tanışlarının köməkliyi və məhkəmələrdə olan əlaqələrindən istifadə edərək zərərçəkmişin əmisi Əliyar Məmmədov barəsində Cinayət Məcəlləsinin 311.3.2 - rüşvət alma təkrar törədildikdə maddəsi üzrə Bakı Ağır Cinayətlər Məhkəməsində baxılan cinayət işi üzrə seçilmiş həbs qətimkan tədbirini müsbət həll edəcəyi barədə yalan vəd verib.

Beləliklə, Asif Əsədullazadə zərəçəkmişə qarşı 205 min manat maddi ziyan vurub. Bununla da Asif Əsədullazadəyə qarşı Cinayət Məcəlləsinin 178.3.2 - külli miqdarda ziyan vurmaqla dələduzluq maddəsi ilə ittiham irəli sürülüb.

Qeyd edək ki, təqsirləndirilən Asif Əsədullazadə Bakı Ağır Cinayətlər Məhkəməsinin sabiq sədri, mərhum hakim Mahmud Nəbiyevin yaxın tanışı olduğunu bildirərək zərərçəkmişi aldadıb.