“Qışın günündə soyuqda qaldıq!” - Əhali niyə qazsız qaldı? - "Tüstü oldu, bilmədim ki..." - Baku TV

Fevralın 18-də Ucarda yanğın baş verib. 11 kəndi qazla təmin edən yeraltı qaz xəttinin Qulabənd kəndi ərazisində qamışlıq sahədən keçən hissəsi naməlum səbəbdən baş vermiş yanğın zamanı zədələnib.

Nəticədə, əraziyə verilən təbii qazın verilişi dayandırılıb və 3049 abonentin qaz təminatında fasilə yaranıb.

“Fevralın 18-i saat 3-də qazlar kəsilib. Hələ də qaz yoxdur. Deyirlər ki, fasilələrlə verəcəklər, bu axşam olacağına inanmıram”, – sakinlərdən biri bildirib.

Başqa bir sakin isə belə deyib:

“Qaz yoxdur. Oruc tutan adamlarıq, ac-susuz qalmışıq. Nə yemək bişirməyə, nə də çay qızdırmağa yer yoxdur”.

Məsələ ilə bağlı “Azəriqaz” İstehsalat Birliyindən bildirilib ki, Ağsu Regional Qaz İstismarı İdarəsinin Ucar Xidmət Sahəsinin əməkdaşları dərhal hadisə yerinə cəlb olunublar:

“Hazırda ərazidə qazıntı işləri yekunlaşıb və polietilen boruların quraşdırılması mərhələsinə başlanılıb. Təmir-bərpa işləri çərçivəsində 315 millimetrlik 10 metr uzunluğunda yeni polietilen boru xətti çəkilir. Eyni zamanda borunun metal hissə ilə birləşmə qovşağı yenisi ilə əvəz olunur. Planlaşdırılan işlərin bu gün saat 17:00-dək başa çatdırılması və qaz təchizatının bərpası nəzərdə tutulur”.