"Altı uçub, uşaqlarla birgə çöküb gedəcək" | Güclü sel dəhşətli fəsadlara səbəb oldu - Baku TV

Qudyalçay Xaçmaz rayonunun Köhnə Xaçmaz kəndi ərazisində bir sıra fəsadlara səbəb olub.

Çay məcrasının genişlənməsi nəticəsində ətrafda torpaq sürüşmələri baş verib və sakinlərin təsərrüfat sahələrinə ziyan dəyib.

Baku TV-nin qaynar xəttinə müraciət edən sakinlər aidiyyəti qurumlardan tədbirlərin görülməsini istəyirlər.

"Əvvəllər buradan nəqliyyat vasitələri rahatlıqla hərəkət edirdi, lakin hazırda yol tamamilə dağılıb. Elə evlər var ki, çayla arasında cəmi 7-10 metr məsafə qalıb. Torpaq qatının sürüşməsi nəticəsində çoxlu sayda meyvə ağacı məhv olub", – sakinlərdən biri söyləyib.

Digər bir kənd sakini isə vəziyyətin kritik olduğunu və təhlükənin hər keçən gün artdığını vurğulayıb:

"Hazırda çay suyu evlərə yaxınlaşır. Bağ-bağatdan əsər-əlamət qalmayıb, ağacların hamısını sel suları yuyub aparıb".