Qurumlar seysmik vəziyyətlə bağlı məlumat verdi - Baku TV

Şamaxı və Ağsu rayonlarının sərhədində, Pirqulu stansiyasından 12 kilometr cənubda 3,8 maqnitudalı zəlzələ olub.

Bu barədə Respublika Seysmoloji Xidmət Mərkəzi məlumat yayıb.

Qeyd olunub ki, ocağı 6 kilometr dərinlikdə yerləşən zəlzələ episentrdə 4 bal, ətraf yaşayış məntəqələrində 3-4 bala qədər hiss olunub.

Hadisə ilə bağlı Fövqəladə Hallar Nazirliyi də açıqlama yayıb. Bildirilib ki, zəlzələ nəticəsində Şamaxı və Ağsuda hər hansı dağıntı və ya insan xəsarəti barədə məlumat daxil olmayıb.

Respublika Seysmoloji Xidmət Mərkəzinin baş direktoru Qurban Yetirmişlinin sözlərinə görə, qeydə alınan yerli təkanlar narahatlığa yol açmır.

O bildirib ki, ümumiyyətlə, ölkəmizdə altı baldan yuxarı zəlzələ gözlənilmir.