Şamaxıda güclü zəlzələ evləri silkələdi | Sakinlər qorxu içində - Baku TV

Şamaxıda zəlzələ qeydə alınıb. Yerli vaxtla saat 15:53 radələrində baş verən yeraltı təkanların gücü 4,7 bal olub.

Bu barədə Respublika Seysmoloji Xidmət Mərkəzi məlumat yayıb.

Şamaxı sakinləri zəlzələni aydın şəkildə hiss etdiklərini bildiriblər.

“İş yoldaşlarımızla çayxanada oturmuşduq. Birdən stulların yelləndiyini gördük, televizor silkələndi. Bir anda qorxuya düşdük. Anladıq ki, zəlzələdir. İnşallah, bir daha təkrarlanmaz. Keçən dəfə də gecə baş vermişdi, hamı qorxudan evdən çölə çıxmışdı”, – sakinlərdən biri deyib.

“Evdə divanda oturmuşdum. Birdən təkanları hiss etdim. Əvvəllər də belə hallar olub. Bu dəfə əməlli-başlı ev silkələndi”, – digər sakin qeyd edib.