“Sanki zəlzələ oldu, töküldü aşağı” | Qorxulu anlar yaşayan sakinlər qəzəb içində - Baku TV

Binəqədi rayonu, 7-ci mikrorayon, Abay Kunanbayev küçəsi 50 ünvanında irigövdəli ağacın budaqları qırılaraq beşmərtəbəli yaşayış binasının üzərinə düşüb.

Sakinlərin sözlərinə görə, hadisə nəticəsində bəzi mənzillərin dam örtüyü və tavanı zədələnib.

“Elə bildim zəlzələ oldu. Mətbəxə girəndə gördüm ki, tavan uçur, evə su dolur. Vəziyyət çox pisdir, gecələr qorxa-qorxa yatırıq”, – deyə sakinlərdən biri bildirib.

Bakı Şəhər Yaşıllaşdırma Təsərrüfatı Birliyindən verilən məlumata görə, ağacdan qırılaraq düşən budaqlar ərazidən yığışdırılıb.

Qeyd olunub ki, xüsusi texnikanın ünvana giriş imkanının məhdud olması səbəbindən ağacın qalan hissələrinin budanması yaxın günlərdə həyata keçiriləcək.