Sükan arxasında etdiyi hərəkət sərxoş sürücüyə baha başa gəldi

Astara Rayon Məhkəməsində polis əməkdaşlarının qanuni tələblərinə qəsdən tabe olmamaqda təqsirləndirilən sürücü barəsində inzibati işə baxılıb.

Astara Rayon Polis Şöbəsinin əməkdaşları xidmətdə olarkən “VAZ 2106” markalı avtomobilin sürücüsünə dönmə işıqlarından istifadə etmədiyinə görə “saxla” işarəsi veriblər. Lakin 25 yaşlı sürücü polisə məhəl qoymayaraq hərəkətini davam etdirib və sonradan da polis əməkdaşlarının qanuni tələblərinə tabe olmayıb.

Araşdırma zamanı sürücünün spirtli içki qəbul etdiyi müəyyən edilib. O, məhkəmədə təqsirini etiraf edərək peşman olduğunu bildirib.

Məlum olub ki, sürücü idarə etdiyi maşını yaşadığı ünvana apardıqdan sonra polis şöbəsinə gələrək təslim olub.

Qərara əsasən, sürücü barəsində 8 sutka inzibati həbs cəzası seçilib.