Yaşayış binasında mənzilin döşəməsi çökdü | 60 ailə təxliyə edildi

Goranboyda beşmərtəbəli binanın 1-ci mərtəbəsinin döşəməsi çöküb.

Hadisə rayonun Cəfər Cabbarlı küçəsində qeydə alınıb.

Altı bloklu yaşayış binasında 2-ci girişin birinci mərtəbəsində 2 mənzilin döşəməsi və arakəsmə divarlarının uçması nəticəsində 4 nəfər xəsarət alıb, 60 ailə təxliyə edilib.

Xəsarət alan 4 nəfər (3-ü qadın, 1-i kişi olmaqla) Goranboy Rayon Mərkəzi Xəstəxanasına hospitalizasiya olunub.

Onlara bədənin müxtəlif nahiyələrinin çoxsaylı travması diaqnozu təyin edilib. Hazırda 2 nəfərin müalicəsi Təcili və təxirəsalınmaz tibbi yardım şöbəsində davam etdirilir. Vəziyyətləri orta ağır olaraq qiymətləndirilir. Digər şəxslərə isə zəruri tibbi yardım göstərildikdən sonra ambulator müalicə üçün evə buraxılıb.

Hadisənin başvermə səbəbləri araşdırılır.