Qırğızıstan SOCAR-la tərəfdaşlığın genişləndirilməsində maraqlıdır - Baku TV

Azərbaycanla Qırğızıstan arasında energetika sahəsindəki əməkdaşlıq yeni mərhələyə qədəm qoyur.

Bunu "Report"a müsahibəsində Qırğızıstanın Azərbaycandakı səfiri Maksat Mamıtkanov bildirib.

Onun sözlərinə görə, 2025-ci ilin dekabr ayında Qırğızıstanla Azərbaycan arasında iqtisadi və humanitar əməkdaşlıq üzrə Hökumətlərarası Komissiyanın iclası zamanı SOCAR ilə Qırğızıstanın yanacaq-energetika bazarının müvafiq strukturları arasında əməkdaşlığın dərinləşdirilməsi məsələsinə baxılıb.

Səfir qeyd edib ki, SOCAR-ın bu sahədə fəaliyyət göstərən Qırğızıstan şirkətləri ilə tərəfdaşlığının genişləndirilməsinə yönəldilir. Burada hidroenergetika, enerji balansının şaxələndirilməsi, yeni bazarlara çıxış, texnoloji innovasiyaların mübadiləsi sahələrində təcrübə mübadiləsi vacibdir.

Maksat Mamıtkanov əlavə edib ki, Qırğızıstan "Mərkəzi Asiya-Azərbaycan Transxəzər Yaşıl Enerji Dəhlizi" layihəsini Mərkəzi Asiya və Qafqaz ölkələri arasında təcrübə və texnologiya mübadiləsi üçün perspektivli əməkdaşlıq istiqaməti kimi nəzərdən keçirir.