Azərbaycandilli məktəblərdə ana dili və ədəbiyyat dərsləri azaldılıb - Baku TV

Son illər qonşu Gürcüstanda Milli Tədris Planına edilən dəyişikliklər səbəbi ilə bu ölkədə fəaliyyət göstərən azərbaycandilli məktəblərdə Azərbaycan dili və ədəbiyyatı dərs saatları azaldılıb.

Belə ki, əvvəllər bu fənlər beş-yeddi saat tədris edilirdisə, son bir neçə ildir ki, dərs saatlarının sayı həftədə üç dəfəyə endirilib. Belə olan halda müəllimlər ciddi çətinliklə üz-üzə qalıblar.

Qeyd edək ki, Gürcüstandakı azərbaycandilli məktəblərə Azərbaycan dili və ədəbiyyatı dərslikləri hər il Azərbaycandan göndərilir və göndərilən bu vəsaitləri həftədə üç saat dərs keçməklə bir tədris ili ərzində yekunlaşdırmaq mümkün deyil.

Onu da bildirək ki, bu tədris ilindən azərbaycandilli məktəblərin gürcü bölmələrində təhsil alan azərbaycanlı şagirdlər üçün həftədə iki dəfə keçirilən Azərbaycan dili və ədəbiyyatı dərsləri tamamilə ləğv edilib.

Müəllim Sevil Mursaqulova məsələ ilə bağlı fikirlərini Baku TV ilə bölüşüb.

“Məktəblərdə gürcü bölməsinin açılması müsbət haldır, lakin orada təhsil alan azərbaycanlı uşaqların öz Ana dilini unutmaması vacibdir. İstəyirik ki, gürcü bölməsində oxuyan şagirdlərimiz üçün də milli mənsubiyyətlərini qorumaları məqsədilə həftədə ən azı iki saat Azərbaycan dili dərsi ayrılsın”, – deyə o bildirib.