Ermənilərin Alban kilsələrinə iddiası nə məqsəd daşıyır? - Baku TV

Qafqaz Albaniyası tarixi bir məsələdir, bunun siyasiləşdirilməsinə imkan verməməliyik.

Bunu Beynəlxalq Münasibətlərin Təhlili və Multikulturalizm Mərkəzinin (BMTMM) İdarə Heyətinin sədri Fərid Şəfiyev jurnalistlərə açıqlamasında deyib.

O bildirib ki, Azərbaycana erməni kilsələrinin albanlaşdırılmasına çalışıldığına dair ittihamlar irəli sürülür:

“Buradan 200 metr aralıda XIX əsrdə Bakıda tikilmiş erməni kilsəsi var. Şuşada da XIX əsrdə tikilmiş erməni kilsəsi var. Biz erməni kilsələrini qoruyub saxlayırıq. Amma həqiqət ondan ibarətdir ki, Azərbaycan ərazisində katolik, pravoslav və erməni kilsələri ilə yanaşı, bizim tariximizə aid olan alban kilsələri də var. O bizim tariximizdir və biz onu qoruyub saxlayırıq”.

BMTMM rəhbəri vurğulayıb ki, Qafqaz Albaniyası tarixi məsələsinin siyasiləşdirilməsinə yol vermək olmaz:

“Qafqaz Albaniyası tarixi bir məsələdir. Bunu siyasətləşdirməyə biz imkan verməməliyik. Amma qarşı tərəf bunu siyasiləşdirirsə, hətta Avropanın müxtəlif siyasətçilərini də bu işə cəlb edirsə, biz buna tutarlı cavab verməliyik”.