Mədəniyyət sahəsində qrantların verilməsinə dair xüsusi qayda müəyyənləşəcək - Baku TV

Mədəniyyət sahəsində qrantların verilməsinə dair xüsusi qayda müəyyənləşəcək. Qeyri-hökumət təşkilatları ilə bərabər digər hüquqi və fiziki şəxslərə də qrant ayrılacaq.

Bu, Prezident İlham Əliyevin təsdiqlədiyi “Mədəniyyət haqqında” Qanuna edilən dəyişiklikdə əksini tapıb.

Qanuna əsasən, mədəniyyət sahəsində layihələrin qrant maliyyələşdirilməsi mədəniyyət xidmətlərinin, habelə mədəni və yaradıcı sənaye sahələrinin inkişafına və keyfiyyətinin artırılmasına yönəldilmiş innovativ fəaliyyət və tədqiqatların stimullaşdırılması, mədəniyyət müəssisələrinin infrastrukturunun inkişaf etdirilməsi, eləcə də mədəniyyət sahəsində maarifləndirmə məqsədilə “Qrant haqqında” Qanuna uyğun olaraq həyata keçiriləcək.

Mədəniyyət sahəsində layihələrin qrant maliyyələşdirilməsi üzrə müsabiqələrin keçirilməsi qaydasını müvafiq icra hakimiyyəti orqanının müəyyən etdiyi orqan müəyyən edəcək.