Xankəndidə polisə silahlı müqavimət göstərən erməniəsilli şəxs barədə açıqlama

“Xankəndi sakini Karen Avanesyanın saxlanılması ilə bağlı Bakının yaydığı məlumatı, hadisəni şərh etməyəcəyəm. Çünki bununla bağlı geniş informasiyaya sahib deyiləm. Amma Karen Avanesyan adlı sakin var idi, sadəcə, Karen Ermənistana keçməyib Xankəndidə qaldı”.

Bunu Qarabağda antiterror əməliyyatından sonra ləğv edilən separatçı rejimin son “rəhbər”i Samvel Şahramanyan jurnalistlərə açıqlamasında deyib.

Xatırladaq ki, 2025-ci ilin sentyabrın 14-də Xankəndi şəhərinin erməniəsilli sakini 1967-ci il təvəllüdlü Avanesyan Karen Albertoviç yaşadığı yerdən meşə massivinə gedərək orada gizlətdiyi “Kalaşnikov” avtomatını və ona aid patronla dolu 4 sandıqçanı, eləcə də 5 ədəd qumbaranı götürüb Xankəndi şəhərində keçirilən tədbir yerinə yaxınlaşmaq istəyərkən polis əməkdaşları onun qarşısını kəsiblər. Bu zaman Karen Avanesyan 3 ədəd əl qumbarası atmaqla və avtomatdan atəş açmaqla polisə silahlı müqavimət göstərib. Cavab atəşi nəticəsində güllə yarası almış Avanesyan tutulub. Əməliyyat zamanı bir polis əməkdaşı yaralanıb. Karen Avanesyan saxlanılıb. Cinayət işi açılıb, əməliyyat-istintaq tədbirləri aparılır.