ABŞ ilə Çin arasında mühüm razılıq

Çin hökuməti Amerika Birləşmiş Ştatlarının və digər ölkələrin narahatlığını nəzərə alaraq bəyan edib ki, Ukrayna ilə müharibədə Rusiyanın lehinə hərbi yardım etmir və etməyəcək.

Bu barədə ABŞ-nin dövlət katibi Entoni Blinken Pekində keçirdiyi rəsmi görüşlərin yekununa dair brifinqdə deyib.

“Biz və digər ölkələr Rusiyaya hərbi dəstək vermədiyinə və gələcəkdə də verməyəcəyinə dair Çindən təminat aldıq. Bu, vacib öhdəlik və siyasətdir. Biz Pekin tərəfindən bu öhdəliyə zidd hər hansı addım görməmişik. Lakin bizi narahat edən Çindəki bəzi özəl şirkətlərdir. Onlar Rusiyanı hərbi və mülki məqsədlər üçün istifadə olunan texnologiya ilə təmin edə bilər”, – deyə o bildirib.

E.Blinken qeyd edib ki, narahatlıq doğurduğundan bu məsələni Çin hökuməti ilə də müzakirə edib və rəsmi Pekini diqqətli olmağa çağırıb.

ABŞ xarici siyasət idarəsinin rəhbəri Tayvan ətrafında yaranan mübahisəli məsələlərlə bağlı ölkəsinin narahatlığını da çatdırıb. Bildirib ki, Vaşinqton Tayvanın müstəqilliyini tanımır.