ABŞ rəsmisi sülh sazişi üzrə bəzi razılıqların əldə olunduğunu bildirib

“Azərbaycan və Ermənistan nümayəndə heyətləri ötən həftə Vaşinqtonda keçirilən danışıqlarda potensial sülh sazişinin bəzi müddəalarını razılaşdırıblar”.

Bunu mayın 8-də jurnalistlər üçün keçirilən növbəti brifinqdə ABŞ Dövlət Departamentinin mətbuat xidmətinin rəhbərinin müavini Vedant Patel deyib.

“Bizim fikrimizcə, ötən həftə aparılan müzakirələr konstruktiv olub. İnanırıq ki, Ermənistan və Azərbaycan nümayəndə heyətləri çətin məsələlərin həllində mühüm irəliləyiş əldə ediblər. Hesab edirik ki, əlavə xoşməramlılıq, çeviklik və kompromislə razılaşma əldə etmək olar”, – deyə o bildirib.

Patelin sözlərinə görə, ABŞ Azərbaycan və Ermənistana bütün lazımi dəstəyi göstərir: “Biz iki dövlət dialoqa davam etdikcə, dayanıqlı sülhə nail olmaq üçün səy göstərdikcə prosesə tam dəstək verəcəyik”.

O qeyd edib ki, mövcud məlumatlara əsasən tərəflər qarşılıqlı əlaqəni davam etdirirlər. V.Patelin fikrincə, birbaşa dialoq, Bakı ilə İrəvan arasında məsələlərin həlli və davamlı sülhə nail olmaq üçün açardır.