Açılışda elə səhnələr var idi ki... | Rüsvayçılıqla yadda qalan “Paris-2024”

Fransanın paytaxtı Parisdə 24 iyuldan start götürən və avqustun 11-nə qədər keçiriləcək Yay Olimpiya Oyunları son günlərin ən həyəcanlı hadisələrindən birinə çevrilib.

Dünyanın müxtəlif ölkələrindən idmançıları bir araya toplayan oyunlarda bir sıra qəribə məqamlar diqqət çəkib.

Bunlardan biri Olimpiya Oyunlarının rəsmi açılış mərasiminin videosunun rəsmi sayt və “YouTube” kanalından silinməsidir.

Yay Olimpiya Oyunlarının Təşkilat Komitəsindən verilən açıqlamaya görə, bu addım geo bloklama ilə bağlıdır. “Geo bloklama” termini daha çox internetdə filmlər və televiziya şouları kimi premium multimedia məzmununa girişin məhdudlaşdırılması, müəllif hüquqları və lisenziyalaşdırma kimi səbəblər ilə əlaqəlidir.

Bu oyunların rəsmi açılış mərasimi ilə bağlı ilk belə skandal deyil. Belə ki, Fransanı tənqid atəşinə tutanlar arasında ABŞ-nin Nümayəndələr Palatasının sözçüsü Mayk Conson, italiyalı siyasətçilər və parlamentarilər, Macarıstanın Baş naziri Viktor Orban, “Tesla”nın baş direktoru İlon Mask da var.

Açılış mərasiminin tənqid olunmasının səbəblərindən biri tədbir zamanı Leonardo Da Vinçinin məşhur əsəri olan sonuncu şam yeməyinin təsviri olub.

Xristianlar üçün müqəddəs hesab edilən bu hadisənin çılpaq müğənni tərəfindən təqdimatı birmənalı qarşılanmayıb. Performans zamanı bir masanın ətrafına toplaşan və İsa Məsihlə onun 12 həvarisinin portretini xatırladan bu çıxış ciddi tənqidə məruz qalıb. Fransanın katolik kilsəsi sosial şəbəkə hesabında tədbirlə bağlı etirazını bildirib.

"Təəssüf ki, bu mərasimdə xristianlığı ələ salan səhnələr var idi və biz bundan çox təəssüflənirik", – deyə məlumatda qeyd olunub.