Aİ missiyasının iftira xarakterli bəyanatı

Qərbi Azərbaycan İcması Avropa İttifaqının Ermənistandakı missiyasının rəhbəri Markus Ritterin qərəzli və həqiqətə uyğun olmayan bəyanatına cavab verib.

Xatırladaq ki, Markus Ritter bu günlərdə açıqlama verərək Azərbaycanın Ermənistana uydurma hücumunun qarşısını almaqdan dəm vurub.

Məsələ ilə bağlı Qərbi Azərbaycan İcmasının sözçüsü Ülviyyə Zülfiqar “Baku TV”yə açıqlama verib: “M.Ritterə xatırlatmaq istərdik ki, Avropa İttifaqının insan hüquqlarının müdafiəsi məqsədilə göndərdiyi missiyanın üzərinə Ermənistandan qovulmuş azərbaycanlılarla bağlı böyük və konkret vəzifə düşür. Onun missiyasının açıldığı sərhəd zonasında yerləşən yaşayış məskənlərinin demək olar ki, hamısı azərbaycanlıların yaşamış olduqları və etnik təmizləməyə məruz qaldıqları məkanlardır. Əminik ki, missiya o kəndlərdə dağıdılmış azərbaycanlı məzarlıqlarını və mədəni irsini hər gün görür.

Missiya rəhbərinin öz mandatına uyğun olaraq gözünün qarşısında olan insan hüquqları pozuntuları ilə məşğul olmaq əvəzinə, iftira və təxribat xarakterli bəyanat verməsi təəssüf doğurur”.

Bəyanatda həmçinin vurğulanıb ki, Avropa İttifaqı, o cümlədən onun Ermənistandakı missiyası Ermənistandan qovulan azərbaycanlıların hüquqlarına hörməti təşviq etməli, bununla da davamlı sülhün əldə olunmasına töhfə verməlidir.