Alen Simonyan görüşdən qabaq sülh sazişindən danışdı

Azərbaycan və Ermənistan xarici işlər nazirləri 3 aydan sonra yenidən bir araya gələcəklər.

Ceyhun Bayramov və Ararat Mirzoyan mayın 10-da Qazaxıstanda görüşəcəklər.

Ermənistan parlamentinin spikeri Alen Simonyan isə görüşdən qabaq sülh müqaviləsinin mümkünlüyü barədə açıqlama verib. Üstəlik, görüşün vasitəçi olmadan keçiriləcəyini də nəzərə alsaq, eləcə də Bakı və İrəvanın mübahisəli məsələlərə məhz vasitəçi olmadan aydınlıq gətirmələri sülh müqaviləsinin də birbaşa danışıqlarla mümkünlüyünü gündəmə gətirir.

Təbii ki, Azərbaycanla Ermənistan arasında müxtəlif platformalarda keçirilən görüşlərə və onların nəticələrinə nəzər salsaq, görərik ki, iki ölkə birbaşa təmaslarla, yəni kənar müdaxilələr olmadan razılaşmaya daha yaxındır.

Bu baxımdan Qazaxıstanda vasitəçi olmadan keçirilən görüş də Bakı ilə İrəvan arasında münasibətlərin tənzimlənməsi üçün növbəti mərhələ hesab oluna bilər.

Azərbaycanla Ermənistan arasında münasibətlərin normallaşması və ilk növbədə mövcudluğunu qoruyub saxlamağa çalışan rəsmi İrəvan üçün daha çox əhəmiyyət kəsb edir. Bu baxımdan Ermənistan rəhbərliyi qətiyyət nümayiş etdirərək götürdüyü öhdəliklərə əməl etməli, onu uçuruma aparan kənar qüvvələrin təsir və təzyiqlərinə uymamalıdır.