Avropa Parlamentinin ikiüzlü mövqeyi

Avropa Parlamenti yaxın günlərdə Azərbaycana qarşı növbəti dəfə obyektivlikdən və reallıqdan uzaq, böhtan xarakterli qətnamə qəbul etməyə hazırlaşır.

Bu, Qərb cəbhəsinin ölkəmizə qarşı düşmən mövqedə dayandığını bir daha sübut edir. Çünki qərəzli qətnamə layihəsinin ilkin mətnində Azərbaycanın guya Ermənistana hərbi təcavüz etməsi və Laçın yolunun guya “blokada”da olması kimi iddialar, eləcə də fəaliyyəti de-fakto olan “Minsk qrupu”, “status”, “Dağlıq Qarabağda və ətrafında” kimi keçmiş, sərsəm və gündəlikdə ümumiyyətlə olmayan cəfəng məsələlər qeyd edilib.

Təəssüf ki, Avropa Parlamenti tərəfindən Azərbaycanla bağlı cəfəng sərsəmləmələrin və qətnamələrin artıq sayı-hesabı itib. Sanki bu qurum Ermənistanın parlamentinə çevrilib, bu ölkənin Xarici İşlər Nazirliyi tərəfindən göndərilən layihələri notarius kimi təsdiqləyir. Əslində isə qurum bununla ölkəmizin ədalətli mövqeyinə təsir göstərmək, nüfuzunu gözdən salmaq və İrəvanın xeyrinə güzəştlər əldə etməyə çalışır.