Avropadan Azərbaycana qarşı yeni həmlə

Azərbaycana qarşı qərəzli mövqeyi ilə seçilən Avropa ölkələri və onların təşkilatlandığı qurumlar növbəti dəfə ənənələrinə sadiqlik nümayiş etdirib. Belə ki, Avropa Parlamenti Azərbaycanın Ermənistana qarşı guya törətdiyi uydurma sentyabr təcavüzünü və Laçın dəhlizinin “blokada”sını pisləyən qətnamə qəbul edib.

Bunu o Avropa edir ki, illərdir arxalandıqları beynəlxalq qanunları heçə sayaraq Azərbaycan torpaqlarının işğalına, yüzminlərlə insanın öz ata-baba yurdlarından məcburi didərgin düşməsinə və hazırda da davam edən mina terroruna susqunluq nümayiş etdirir. Bunun arxasında isə xristianların özünü belə təhlükələrdən qorumaqda aciz olan xristian birliyi, dini ayrı-seçkilik dayanır.

Ancaq bu gün Ukraynada müşahidə etdiyimiz fəlakət, əslində, bu birliyin mahiyyətcə heç olduğunu nümayiş etdirir. Lakin məsələnin digər bir tərəfi 21-ci əsrdə Avropanın mərkəzində deputatların Ermənistan-Azərbaycan münasibətlərinə sırf xristian həmrəyliyi kontekstindən yanaşmasıdır. Tərəflərin münasibətlərini sülh yolu ilə həll etməli olduğu bir vaxtda bu cür qətnamənin qəbulu nədən xəbər verir?