Avtomobil və dəmiryolu əlaqələrinin açılması... | Paşinyandan mühüm açıqlama

“Cənubi Qafqazda davamlı sülh nəinki mümkündür, həm də realdır”.

Bunu “İrəvan Dialoqu” forumunun açılışında Ermənistanın Baş naziri Nikol Paşinyan deyib.

O, Ermənistanın mövqeyini təqdim edərkən bildirib ki, sülh müqaviləsinin 80%-i artıq razılaşdırılıb, o cümlədən 13 maddə və əlavə üç maddə qismən razılaşdırılıb – onların hər biri iki cümlədən ibarətdir. Ermənistan sazişin razılaşdırılmış hissələrini imzalamağı və qalan bəndlər üzrə işi davam etdirməyi təklif edir.

Baş nazir onu da vurğulayıb ki, sənəd Ermənistanla Azərbaycan arasında diplomatik münasibətlərin qurulmasını nəzərdə tutur.

N.Paşinyan həmçinin qeyd edib ki, hazırda Ermənistanla Azərbaycan arasında sərhədlərin delimitasiyası və demarkasiyası məsələlərində irəliləyiş var. Onun fikrincə, regionda nəqliyyat kommunikasiyalarının açılması da uzunmüddətli sülhə doğru mühüm addımdır.

N.Paşinyan əlavə edib ki, Azərbaycanla Naxçıvan arasında Ermənistan ərazisindən keçən avtomobil və dəmir yolu əlaqələrinin açılması da mühüm addımdır.

“Ermənistan bu imkanı yaratmağa hazırdır, baxmayaraq ki, Naxçıvan artıq İran və Türkiyə vasitəsilə xarici dünyaya çıxış əldə edib”, – deyə Baş nazir vurğulayıb.