Azərbaycan Argentinaya nota verib

Argentinanın Azərbaycandakı səfiri Marianxeles Belluşi Xarici İşlər Nazirliyinə çağırılıb.

Xarici İşlər Nazirliyindən verilən məlumata görə, görüş zamanı Argentina Prezidenti Alberto Fernandesin sentyabrın 10-da Nyu Delhi şəhərində G20 sammiti zamanı ölkəmizə qarşı qərəzli fikirlər səsləndirməsi ilə bağlı rəsmi Bakının etiraz notası Argentina səfirinə təqdim edilib.

Ermənistanın Azərbaycana qarşı apardığı qarayaxma kampaniyasına əsaslanaraq bölgədəki reallıqları təhrif edən, suverenliyimiz və ərazi bütövlüyümüzə qarşı terminalogiyanın əks olunduğu bu kimi əsassız fikirlərin səsləndirilməsinin təəssüf doğurduğu bildirilib. Azərbaycan tərəfindən erməni sakinlərin ehtiyaclarının qarşılanması məqsədilə alternativ yollardan, o cümlədən Ağdam-Xankəndi yolundan istifadə təklifləri, göndərilən ərzaq məhsullarının hələ də qəbul edilməməsi, vəziyyətin Ermənistanın iddia etdiyi kimi humanitar deyil, siyasi xarakter daşıdığını nümayiş etdirdiyi bildirilib. Bu xüsusda, Azərbaycanın ərazi bütövlüyü və suverenliyinə qarşı olan bəyanatlardan çəkinilməsinin vacib olduğu Argentina tərəfinin diqqətinə çatdırılıb.