Azərbaycan ərazi bütövlüyünü bərpa etdi

Laçın-Xankəndi yolunda Azərbaycanın nəzarət-buraxılış məntəqəsinin yaradılması Prezident İlham Əliyevin daha bir qətiyyətli və ardıcıl siyasətinin nəticəsidir. Dövlət başçısının sərt və barışmaz mövqeyi, dəhlizin 5 km müəyyən edilməsi, 3 il müddətində yeni yolun istifadəyə verilməsi və Laçın rayonunun mərkəzinin Azərbaycana qaytarılması ilə bağlı prinsipial müddəaların üçtərəfli bəyanatda əksini tapması bunun əyani sübutudur. Məhz bu uğurlu ardıcllığın nəticəsidir ki, bu gün Azərbaycan bayrağı Laçın-Xankəndi yolunda ərazilərimizə nəzarəti bərpa etməyin sübutu kimi qürurla dalğalanır.

Təəssüflər olsun ki, Azərbaycanın öz suveren hüquqlarından istifadə edərək, beynəlxalq hüquqa tam uyğun şəkildə Azərbaycan-Ermənistan sərhədinin Laçın yolu hissəsində nəzarət-buraxılış məntəqəsi quraşdırması təkcə Ermənistanı yox, himayədarlarını da narahat edir. Azərbaycana qarşı dünyada kampaniya təşkil edilir, təzyiqlər göstərilir, guya Azərbaycanın Qarabağda etnik təmizləmə siyasəti həyata keçirməsi kimi sərsəm bəyanatlar səsləndirilir. Lakin bu cür qərəzli mövqeyə ən gözəl cavabı da elə Azərbaycan özü verib. Ərazi bütövlüyümüz bərpa edilib, proseslər rəsmi Bakının diqtəsi ilə həyata keçirilir.