Azərbaycan-Ermənistan sülh sazişinin mətni paraflanacaq | “Caliber.az”dan mühüm məlumat

Yaxın vaxtlarda Vaşinqtonda mühüm siyasi və tarixi əhəmiyyətə malik hadisa baş verəcək ‒ Azərbaycan Respublikası ilə Ermənistan Respublikası arasında sülh sazişinin mətninin paraflanması baş tutacaq.

Bu barədə "Caliber.az"ın "Telegram" kanalı məlumat yayıb.

"Bu addım o deməkdir ki, tərəflər müqavilə layihəsinin bütün bəndləri üzrə konsensus əldə ediblər və onun məzmunu ilə razılaşdıqlarını rəsmən qeyd edəcəklər.

Paraflanma mühüm diplomatik prosedurdur, sazişin yekun imzalanmasına bərabər olmasa da, mətnin təsdiqi mərhələsinin başa çatdığını göstərir.

Beynəlxalq təcrübə nöqteyi-nəzərindən bu, tərəflərin tam va hüquqi öhdəliyi olan sülh müqaviləsinin bağlanmasına doğru irəliləməyə hazır olduğunu qeyd edir. Eyni zamanda sülh müqaviləsinin bilavasitə imzalanması 2026-cı ildə Ermənistanda konstitusiya dəyişiklikləri üzrə ümumxalq referendumundan sonra baş tuta bilər", ‒ deyə materialda bildirilir.