Azərbaycan əsgəri vuruldu, Paşinyan Azərbaycanı günahlandırdı | Paşinyandan gülünc açıqlama

“Azərbaycan dialoq yolu ilə əldə edə bilmədiyi şeylərə nail olmaq üçün hərbi müdaxilə təhlükəsindən istifadə edir”.

Bunu Ermənistan Baş naziri Nikol Paşinyan hökumətin iclasında deyib.

Onun sözlərinə görə, Nerkin-Hand kəndi yaxınlığında baş vermiş son hadisə Azərbaycanın “destruktiv siyasəti”nin növbəti təzahürü idi:

“Bu, Azərbaycanın Ermənistana qarşı hərbi zorakılıq məqsədlərinin dəyişməz olduğunu göstərir. Bizdə belə bir təəssürat yaranır ki, Azərbaycan sərhədlərin sabitliyi və təhlükəsizliyi məsələsinə biganədir.

Belə düşünmək üçün kifayət qədər əsaslar var. Xüsusilə, 2022-ci ildə razılıq əldə olunub ki, sərhədlərin delimitasiyası komissiyalarının vəzifələrinə sərhəd təhlükəsizliyi məsələləri də daxil edilsin.

Ermənistan sərhədlərin delimitasiyası və təhlükəsizlik məsələləri üzrə komissiya yaratdığı halda, Azərbaycan təhlükəsizlik komponentini daxil etmədən sərhədlərin delimitasiyası üzrə komissiya ilə məhdudlaşıb. Bu və digər faktlar göstərir ki, Azərbaycan belə bir yanaşma tutur: “Danışıqlar yolu ilə istədiyimi verin, əks halda zorla alacam”.

Erməni Baş nazir onu da bildirib ki, daim 4 kənddən danışan Azərbaycan guya 31 erməni kəndinin “mühüm ərazilərinin işğalını” tamamilə unudur:

“Ermənistan eyni zamanda konstruktiv yanaşma nümayiş etdirərək Azərbaycanla sərhədin yerdə müəyyənləşdirilməsini və qoşunların çıxarılmasının həyata keçirilməsini təklif edib”.