Azərbaycan hərbçisi erməni əsgərinin həyatını xilas etdi

Azərbaycan Ordusunun mənsubları insani keyfiyyətləri ilə yenidən gündəmə gəlib.

Belə ki, lokal xarakterli antiterror tədbirləri zamanı yaralanan və əsir düşən erməni hərbçisinə humanist davranaraq ona ilk tibbi yardım göstəriblər.

Hərbçilərimizin yardım göstərdiyi əsgər Ermənistan vətəndaşı Karen İsanyandır. O, keçmiş Ağdərə, hazırkı Kəlbəcər rayonunun Vəngli kəndi istiqamətində aşkarlanıb. Karen Xankəndidə yaşayan Ermənistan vətəndaşıdır.

Onun sözlərinə görə, Ermənistanın hərbi-siyasi rəhbərliyi tərəfindən 2022-ci ildə Qarabağa hərbi xidmətə göndərilib. Altı ay xidmət çəkdikdən sonra isə onunla 3 illik müqavilə imzalanıb. Karen xuntanın nəzarətində olan silahlı dəstələr sırasında tuşlayıcı kimi xidmət çəkib.

Bu arada, Naxçıvan istiqamətində hava şəraitinin pisləşməsi nəticəsində yolunu azıb Ermənistan ərazisinə keçən əsgərlərimizi, daha doğrusu, onlara olan rəftarı xatırladaq. Bir tərəfdə bizim əsgərin tərk-silah edilən hərbi əsirlə davranışı, digər tərəfdə isə Ermənistan vətəndaşlarının silahsız girova münasibəti. Bu, radikal erməni zümrəsinin, revanşizm xülyasında olan təbəqənin “Azərbaycanlılar bizim kökümüzü kəsəcək”, “Qarabağdan qovub çıxaracağıq” deyib bağırdıqları iddiaları darmadağın edir.