Azərbaycanın ədalət dərsi qisas deyil, sülhdür - Baku TV

Azərbaycanın müasir tarixində beynəlxalq hüquqla real siyasi vəziyyət arasındakı ziddiyyətin ən bariz nümunəsi Qarabağ münaqişəsi olub. BMT Təhlükəsizlik Şurası 1993-cü ildə Ermənistan silahlı qüvvələrinin işğal olunmuş Azərbaycan ərazilərindən çıxarılmasını tələb edən 4 qətnamə qəbul etsə də, həmin sənədlərin icrası uzun illər təmin edilməyib. Nəticədə, işğal davam edib, yüz minlərlə insan doğma yurdlarından didərgin düşüb, şəhər və kəndlər dağıdılıb.

Beynəlxalq təşkilatların qərarlarının icrasız qalması isə təcavüzkar tərəfdə cəzasızlıq hissini gücləndirib.

Azərbaycan Prezidenti AQEM tribunasında bu məsələyə toxunaraq vurğulayıb:

“BMT-nin Təhlükəsizlik Şurasının və digər beynəlxalq təşkilatlarının qəbul etdiyi qərar və qətnamələrin icrasını təmin edən mexanizmlər hazırlanmayana qədər müharibələr və münaqişələr davam edəcək və yeniləri meydana çıxacaq. Əgər işğal, soyqırımı və etnik təmizləməyə görə Ermənistana vaxtında sanksiyalar tətbiq edilsəydi, Azərbaycan döyüş meydanında erməni faşizminin belini qırmağa məcbur qalmazdı. Təcavüzkarın cəzasız qalması onun həyasızlığının miqyasını yalnız daha da artırırdı”.

Prezident İlham Əliyevin bu sözləri yalnız Ermənistan-Azərbaycan münaqişəsinin nəticələrinə deyil, bütövlükdə beynəlxalq münasibətlər sistemindəki etimad böhranına işarədir. Çünki beynəlxalq hüququn dövlətlərə münasibətdə fərqli meyarlarla tətbiqi onun nüfuzunu zəiflədir. Azərbaycan torpaqları işğal altında olduğu müddətdə təsirli təzyiq mexanizmlərinin işə düşməməsi də bu problemin miqyasını üzə çıxarıb.

Dövlət başçısı Avropa Parlamenti və Avropa Şurasının mövqeyini də tənqid edərək beynəlxalq institutların ikili standartlardan uzaq, prinsipial və ardıcıl fəaliyyət göstərməsinin vacibliyini vurğulayıb.