Azərbaycan iddia sənədini təqdim etdi : Ermənistan 30 ilin cavabını verəcək
Azərbaycan hökuməti Ermənistana qarşı əsas iddia sənədini Beynəlxalq Ədalət Məhkəməsinə təqdim edib.
Bu barədə Xarici İşlər Nazirliyindən məlumat verilib. Bildirilir ki, iddia sənədi 30 illik ədalətsizliyi qeydə alan minlərlə səhifəlik dəlillərə əsaslanır.
Nazirliyin açıqlamasında həmçinin bilidirilir ki, Azərbaycan tərəfi təqdim edilmiş müfəssəl sübutlar əsasında məhkəmədən azərbaycanlıların hüquqlarının geniş şəkildə pozulmasına görə Ermənistanın məsuliyyət daşıdığına dair vəsatətin təmin olunmasını tələb edib.
Azərbaycan tərəfinin müraciətində həmçinin Ermənistanın itkin düşmüş azərbaycanlılara dair bütün məlumatları açıqlamaqla bağlı öhdəliklərini yerinə yetirməsi, qanunsuz ələ keçirilmiş bütün əmlak və torpaqları azərbaycanlılara geri qaytarması, nifrət zəminində təbliğatı dayandırması və insan hüquqlarının 30 il ərzində pozulmasına görə məsuliyyətə cəlb olunmasının vacibliyi vurğulanıb.
Qeyd olunub ki, Azərbaycan tərəfi sözügedən cinayətləri törədənlərin beynəlxalq hüquqi məsuliyyətə cəlb olunması istiqamətində bütün zəruri tədbirləri davam etdirəcək.