Azərbaycan Ordusunun arsenalı yeni silahlarla zənginləşdiriləcək - Baku TV

“Müdafiə sənayesi çox vacib sahədir. Biz bu sahəni inkişaf etdiririk”.

Bu fikirləri Slovakiya Prezidenti Peter Pelleqrini Azərbaycan Prezidenti İlham Əliyevlə keçirilən təkbətək görüşdən sonra mətbuata bəyanatında səsləndirib.

Dövlət başçısı Slovakiyanın müdafiə sənayesində böyük təcrübəyə malik olduğunu vurğulayıb:

“Özüyeriyən artilleriya qurğuları, sursat və digər müdafiə məhsulları üzrə geniş təcrübəmiz var. Bizim niyyətimiz yalnız Azərbaycana silah satmaq deyil. Texnologiya ötürülməsi, Azərbaycan maliyyəsinin cəlb olunması və birgə istehsal sahəsində əməkdaşlıq edə bilərik. Birlikdə istehsal ediləcək məhsulları üçüncü ölkələrə də sata bilərik”.

P.Pelleqrini bildirib ki, Slovakiyanın Baş nazirinin müavini və müdafiə naziri Robert Kalinakın Bakıya səfəri zamanı Azərbaycan tərəfi avtomatik artilleriya sistemlərinin alınmasına maraq göstərib:

“Əminəm ki, bu silah növləri Azərbaycan Silahlı Qüvvələrini daha da gücləndirəcək”.

Slovakiya Prezidenti həmçinin Qarabağ bölgəsində slovak şirkətinin “ağıllı kənd” layihəsi həyata keçirdiyini və Slovakiyanın ixrac-idxal bankının müxtəlif layihələrin maliyyələşdirilməsinə hazır olduğunu qeyd edib:

“Birgə müəssisələr, şirkətlər və texnologiya ötürülməsi istiqamətində daha sıx əməkdaşlıq etmək niyyətindəyik”.