Azərbaycan səfirinin Vaşinqton görüşü ilə bağlı məqaləsi Avropa gündəmində - BİZDƏN NƏ DANIŞIRLAR?

“Bizdən nə danışırlar?” verilişinin yeni buraxılışı yayımlanıb.

Verilişdə bildirilib ki, Norveçin “Geopolitika” nəşrində Azərbaycanın İsveç, Finlandiya, Norveç, Danimarkadakı səfiri Zaur Əhmədovun Cənubi Qafqaz regionunda çoxdan gözlənilən sülhə yol açan Azərbaycanla Ermənistan arasında sülh sazişinin paraflanmasına dair məqaləsi dərc olunub.

Müəllif bu sazişin uzunmüddətli ardıcıl diplomatik səylərin nəticəsi olduğunu yazır.

Diplomat vurğulayıb ki, sazişin yekun imzalanması üçün əsas şərt Ermənistanın Azərbaycana qarşı ərazi iddiaları ilə bağlı müddəaları istisna edərək Konstitusiyaya düzəlişlər etməyə hazır olmasıdır.

Bildirilib ki, razılaşmaların mühüm hissəsi bütün nəqliyyat və kommunikasiya xətlərinin, o cümlədən Azərbaycanın materik hissəsi ilə Naxçıvan arasında Ermənistan ərazisindən keçməklə təhlükəsiz quru yolu dəhlizinin açılması idi.

Ermənistanın Konstitusiya İslahatları Şurası yaxın günlərdə ölkənin yeni Konstitusiyasının hazırlanması ilə bağlı iclaslar keçirəcək.

Ermənistanın “Hraparak” qəzeti bu barədə xəbər yayıb.

Mənbə qeyd edir ki, Şura yeni Konstitusiyanın hazırlanmasını cəmiyyətin tələbi kimi təqdim etməyə hazırlaşır.