Azərbaycan və Ermənistan mümkün qədər tez... | ABŞ rəsmisindən açıqlama

“ABŞ Cənubi Qafqaz xalqlarına sülh və sabitlik gətirən istənilən prosesə kömək etməyə hazırdır”.

Bunu “Report”un ABŞ-nin Azərbaycan və Ermənistan arasında davamlı sülhün əldə olunması istiqamətində səyləri ilə bağlı sorğusuna cavab olaraq Dövlət Departamentinin rəsmi nümayəndəsi deyib.

O vurğulayıb ki, ABŞ dövlət katibi Entoni Blinken, eləcə də ölkənin bir sıra rəsmiləri həm Ermənistan, həm də Azərbaycan hökumətlərində yüksək vəzifəli rəsmilərlə daim təmasdadırlar.

“ABŞ sülh sazişi bağlamaq üçün çalışan hər iki ölkəni dəstəkləməyə sadiqdir. Ermənistan və Azərbaycan arasında indiyədək əldə edilmiş irəliləyişdən ruhlanırıq və regionun rifahı üçün iki ölkənin mümkün qədər tez sülh sazişi bağlamasını dəstəkləyirik”, – deyə açıqlamada qeyd olunub.

Dövlət Departamentinin rəsmisi delimitasiya prosesi ilə əlaqədar Bakı və İrəvan arasında əldə olunmuş razılaşmanı da alqışladıqlarını söyləyib: “Biz Alma-Ata Bəyannaməsinə əsaslanan sərhədlərin delimitasiyası üzrə davamlı irəliləyişi alqışlayırıq. Bu, iki ölkə arasında davamlı və layiqli sülh sazişinin bağlanması istiqamətində mühüm addımdır”, – deyə o bildirib.