Azərbaycan və İsrail prezidentləri Münxendə nələri müzakirə etdi

Fevralın 16-da Münxendə Prezident İlham Əliyevlə qarşı tərəfin müraciətinə əsasən İsrail Prezidenti İsxak Hersoqun görüşü olub.

İsrail Prezidenti İsxak Hersoq dövlət başçısına prezident seçkilərində qələbə qazanması münasibətilə təbriklərini çatdırıb.

İlham Əliyev təbrikə görə təşəkkürünü bildirib və bununla bağlı İsxak Hersoqdan rəsmi məktub formasında da təbrik aldığını məmnunluqla qeyd edib.

Söhbət zamanı Azərbaycanla İsrail arasında müxtəlif sahələrdə əməkdaşlığa dair fikir mübadiləsi aparılıb, hökumətlərarası komissiyanın fəaliyyəti qeyd olunub, iqtisadi-ticari, mədəni, humanitar əlaqələrə toxunulub. Həmçinin Azərbaycanın İsraildə səfirliyinin fəaliyyətə başlamasının ikitərəfli əlaqələrimizin inkişafına təkan verdiyi bildirilib.

Görüşdə qarşılıqlı maraq doğuran digər məsələlər ətrafında da fikir mübadiləsi aparılıb.