Azərbaycan xarici işlər naziri Kiyevdə bir sıra görüşlər keçirir - Baku TV

Azərbaycanın xarici işlər naziri Ceyhun Bayramovun rəhbərlik etdiyi nümayəndə heyəti Ukraynaya rəsmi səfər edib.

Baku TV-nin Şərqi Avropa üzrə xüsusi müxbiri Mübariz Aslanovun verdiyi məlumata görə, səfər Ukraynanın xarici işlər naziri Andrey Sibiqanın Ceyhun Bayramovu qarşılaması ilə başlayıb.

Tərəflər Ukrayna uğrunda həlak olanların xatirəsini yad edib, onların fotoları önünə gül dəstələri qoyublar.

Daha sonra Ukrayna Xarici İşlər Nazirliyində təkbətək və geniş tərkibli görüşlər keçirilib. Görüşlərdə Azərbaycan-Ukrayna münasibətləri, xüsusilə ticarət-iqtisadi əməkdaşlığın inkişafı müzakirə olunub.

Andrey Sibiqa Qara dəniz və Azov dənizində baş verən hadisələr zamanı həlak olan Azərbaycan vətəndaşlarının ailələrinə başsağlığı verib.

Mübariz Aslanovun məlumatına görə, Ceyhun Bayramov daha sonra Ukrayna XİN rəhbərinin müavini Aleksandr Mişenko ilə birlikdə İrpen şəhərinə səfər edib. Burada Zərifə Əliyevanın adına parkda onun abidəsi ziyarət olunub, Zərifə Əliyeva adına 12 saylı liseyə və muzeyə baxış keçirilib.

Nümayəndə heyəti həmçinin Azərbaycan tərəfindən bərpa olunan İrpen şəhər mərkəzi poliklinikasında olub. Müharibə zamanı dağıdılan İrpen Mədəniyyət Evinin bərpası layihəsi ilə də tanış olublar.