Azərbaycan XİN başçısı diplomatik fəaliyyəti başa çatan Cahit Bağcını qəbul edib

Xarici işlər naziri Ceyhun Bayramov Türkiyənin ölkəmizdəki səfiri Cahit Bağcını Azərbaycandakı diplomatik fəaliyyətinin başa çatması ilə bağlı qəbul edib.

Nazir Ceyhun Bayramov Boluda baş verən faciəvi yanğınla bağlı qardaş Türkiyə Cümhuriyyətinə bir daha başsağlığı verib, səfirin ölkəmizdəki səmərəli diplomatik fəaliyyətinə, Azərbaycan-Türkiyə qardaşlığına verdiyi töhfələrə görə təşəkkür edib.

Həmçinin qarşılıqlı maraq doğuran regional və beynəlxalq təhlükəsizlik məsələləri müzakirə olunub. Görüş əsnasında Azərbaycanın xüsusilə Yaxın Şərq və Suriyada sabitliyə, humanitar məsələlərin həllinə qardaş Türkiyə ilə birgə dəstək verməyə davam edəcəyi qeyd olunub. Ölkəmizin Afrika qitəsində Türkiyə ilə birgə əməkdaşlığı üçün geniş perspektivlərin olduğu bildirilib.

Səfir Cahit Bağcı Türkiyənin qardaş Azərbaycanda səfiri kimi fəaliyyətini hər zaman qürurla xatırlayacağını diqqətə çatdıraraq göstərilən dəstəyə görə təşəkkür edib, bundan sonra da Azərbaycan-Türkiyə qardaşlıq və müttəfiqliyinə əlindən gələn töhfəni verməyə hazır olduğunu bildirib.