Azərbaycan XİN-dən Ermənistana sərt bəyanat
“Ermənistan tərəfinin növbəti hərbi təxribatını qətiyyətlə pisləyir və İrəvandan son zamanlar daha da artan təcavüzkar ritorikasından əl çəkməyi və bölgədə gərginliyi artıran bu kimi addımlara son qoymağı tələb edirik”.
Bu barədə Azərbaycan Xarici İşlər Nazirliyinin Ermənistan tərəfindən sərhədyanı bölgədə törədilmiş hərbi təxribat barədə yaydığı bəyanatda deyilir.
“Ermənistan tərəfi Avropa İttifaqının mülki monitorinq missiyasının ərazisində yerləşməsindən bölgədə gərginliyi artırmaq və hərbi təxribatlarını ört-basdır etmək məqsədilə sui-istifadəyə son qoymalıdır. Sözügedən missiyanın mövcudluğunun Ermənistanın üzərinə götürdüyü öhdəlikləri yerinə yetirməkdən boyun qaçırması üçün bəhanəyə çevrilməməsi zəruridir. Bölgədə Azərbaycanın apardığı sülh quruculuğu tədbirlərinə qarşı təxribatlara görə bütün məsuliyyət Ermənistanın siyasi-hərbi rəhbərliyinin üzərinə düşür”, - deyə bəyanatda qeyd olunub.