Azərbaycana 100 metr ərazi verib... | Paşinyandan delimitasiya açıqlaması

“Azərbaycanla sərhədin delimitasiyası prosesi zamanı ərazi mübadiləsi ilə bağlı problem yaranarsa, Ermənistan hakimiyyəti referendum keçirməyə təşəbbüs edəcək”.

Bu sözləri Ermənistanın Baş naziri Nikol Paşinyan Sünik rayonunun Şinuayr kəndində sakinlərlə görüşü zamanı bildirib.

“Ola bilər ki, buradan 100 kvadratmetr ərazi verib, oradan eyni həcmli ərazi alaq. Əgər belə bir hal baş verərsə, o zaman biz heç nəyə qərar verməyəcəyik. Referendumun keçirilməsinə ehtiyac duyularsa da, buna siz qərar verəcəksiniz”, – deyə N.Paşinyan sakinlərə müraciət edib.

“Biz düzgün başa düşməliyik. Belə ki, biz Azərbaycanla yeni sərhəd formalaşdırmırıq, sovet dövrünün sərhədlərini bərpa edirik”, – deyə o əlavə edib.

Məlumat üçün bildirək ki, 17 iyun tarixində Nikol Paşinyan Azərbaycanla sərhədyanı rayonlara və bir sıra kəndlərə baş çəkib. Onun tapşırığı ilə yerli sakinlər üçün 13 ev tikilib. Sakinlərlə görüşdə Gorusun meri Aruş Aruşanyan da iştirak edib.

Qeyd edək ki, bu barədə Ermənistanın Nazirlər Kabineti məlumat yayıb.