Azərbaycana qarşı hibrid təhdidlər davam edir

Milli Məclisin Xarici müdaxilələrə və hibrid təhdidlərə qarşı komissiyası bir sıra sosial media səhifələri vasitəsilə Azərbaycana qarşı yönəlmiş planlı informasiya hücumlarının davam etdiyini açıqlayıb.

Komissiyanın müşahidələrinə əsasən, qonşu dövlətlərdən birinin ərazisindən idarə olunan bəzi “Facebook” səhifələri – “Echo of Baku”, “Azeri Horizon”, “Xəbər24”, “Merry you”, “Azerbaijan Pulse”, “AZ insight” vasitəsilə Azərbaycan ictimai rəyinə təsir göstərmək cəhdləri edilir.

Bu səhifələr üzərindən yayımlanan materiallarda məqsəd ölkədə ictimai fikri çaşdırmaq, dövlətin daxili və xarici siyasətinə kölgə salmaq, həmçinin informasiya məkanında çaşqınlıq yaratmaqdır. Paylaşılan manipulyasiya xarakterli yazıların sonunda isə istifadəçilər “The Telegraph” kimi xarici platformalara yönləndirilir.

Komissiya bildirir ki, bu keçidlər vasitəsilə istifadəçilərin şəxsi məlumatlarının ələ keçirilməsi ehtimalı var. Milli Məclisin müvafiq komissiyası vətəndaşları belə təxribat xarakterli paylaşımlara inanmamağa və dezinformasiyalara qarşı diqqətli olmağa çağırır.