Azərbaycandan Ermənistana görüşlə bağlı təklif

“Biz neytral üçüncü ölkədə və ya Ermənistan-Azərbaycan dövlət sərhədində görüşə bilərik”.

Bunu Azərbaycan xarici işlər naziri Ceyhun Bayramov dekabrın 28-də ilin yekunlarına dair mətbuat konfransında deyib.

Onun sözlərinə görə, Azərbaycan və Ermənistan arasında dövlət sərhədinin delimitasiyası üzrə Dövlət Komissiyasının artıq sərhəddə iki görüşü olub:

“Prinsip etibarilə hər hansı bir həssaslıq yaratmamaq şərti ilə Ermənistan və Azərbaycan xarici işlər nazirləri və nümayəndə heyətləri də dövlət sərhədində görüşə bilər. Belə bir təklif tərəfimizdən səslənib. Vaxt uyğun olduğu zaman belə görüşlərin Azərbaycan və Ermənistanda keçirilməsi perspektivinə gəldikdə isə niyə də yox. Düşünürəm ki, gec-tez bunu da görəcəyik”.