Azərbaycanın ATƏT yanında daimi nümayəndəliyi bəyanat yaydı

Azərbaycanın ATƏT yanında Daimi Nümayəndəliyi Şuranın iclasında Ermənistanın sülh müqaviləsi üzrə danışıqlar prosesini pozmağa yönəlmiş təxribatları və təcavüzü ilə bağlı Bəyanatla çıxış edib.

Bəyanatda 10-11 may tarixlərində Ermənistanın növbəti dəfə hərbi təxribat törətdiyi, nəticədə 1 hərbi qulluqçumuzun həlak olduğu, 1-nin isə ağır yaralandığı diqqətə çatdırılıb. Ermənistanın Vaşinqton görüşündən dərhal sonra qəsdən törətdiyi bu təxribatla sülh gündəliyinin irəli aparılmasında maraqlı olmadığını göstərdiyi bildirilib.

Son dövrlərdə Ermənistanda baş verən hadisələrin, xüsusilə Azərbaycan hərbçilərinə qarşı qondarma məhkəmə prosesi, “Nemesis” terror əməliyyatına həsr olunan abidənin qoyulmasının bölgədə sülh və təhlükəsizliyə təhdid törədən revanşizm meyllərin artdığını nümayiş etdirdiyi qeyd olunub.

Bəyanatda həmçinin normallaşma gündəliyinin təşəbbüskarı olan və işğaldan azad edilən ərazilərdə genişmiqyaslı bərpa işləri aparan Azərbaycanın gərginlikdə maraqlı olmadığı, habelə təxribatların qarşısını almaq üçün bütün lazımi tədbirləri gördüyü söylənib.

Ermənistanın bu kimi təxribatlarının beynəlxalq ictimaiyyət tərəfindən qınanılmalı olduğu, o cümlədən bu ölkəni sülh gündəliyinə sadiq qalmağa təşviq etmək məqsədilə beynəlxalq səylərin gücləndirilməsinin vacibliyi vurğulanıb.