Azərbaycanlı nümayəndə heyəti Özbəkistana səfər etdi | Nələr müzakirə edildi?

Azərbaycan müdafiə nazirinin müavini – Hərbi Hava Qüvvələrinin komandanı general-leytenant Namiq İslamzadənin rəhbərlik etdiyi nümayəndə heyəti Özbəkistana səfər edib.

Səfər bu ölkənin Hava Hücumundan Müdafiə və Hərbi Hava Qüvvələrinin komandanı general-mayor Axmad Burxanovun dəvəti ilə baş tutub.

Azərbaycan Müdafiə Nazirliyindən verilən məlumata görə, Namiq İslamzadə Özbəkistan müdafiə naziri Şuhrat Xalmuxamedov və özbək həmkarı general-mayor Axmad Burxanovla görüşüb.

Keçirilən görüşlərdə hər iki ölkə arasında hərbi sahədə əməkdaşlığın cari vəziyyəti və inkişaf perspektivləri müzakirə olunub, Azərbaycanın Özbəkistanla hərbi aviasiya və hava hücumundan müdafiə sahəsində təcrübə mübadiləsinin inkişaf etdirilməsi üçün qarşılıqlı səfərlərin əhəmiyyəti və digər məsələlər ətrafında geniş fikir mübadiləsi aparılıb.