Bakı Təşəbbüs Qrupu bəyanat yayıb

“Kanakinin müstəqillik hərəkatlarının nümayəndələri ilə Fransa hökuməti arasında imzalanmış Bujival razılaşması Yeni Kaledoniyanı müstəmləkə əsarəti altında saxlamaq xarakteri daşıyır və kanak xalqının müstəqillik mübarizəsinin prinsiplərinə ziddir”.

Bu fikirlər Bakı Təşəbbüs Qrupunun Fransanın Yeni Kaledoniyaya münasibətdə müstəmləkəçilik siyasətini davam etdirmək cəhdlərinin pislənildiyi bəyanatında yer alıb.

Bəyanatda qeyd olunub ki, Kanak və Sosialist Milli Azadlıq Cəbhəsinin 45-ci qurultayında Fransanın Yeni Kaledoniyaya sırımağa çalışdığı Bujival razılaşması qətiyyətlə rədd edilib:

“Qurultay iştirakçıları 1998-ci ildə imzalanmış Numea Sazişinin Yeni Kaledoniyanın dekolonizasiyasının əsas hüquqi dayağı kimi təsdiqləndiyini və Bujival razılaşmasının Numea Sazişinin müddəalarına tamamilə zidd olduğunu bəyan ediblər”.

Qeyd edək ki, Kanak və Sosialist Milli Azadlıq Cəbhəsi “Kanaki Sazişi” çərçivəsində ölkənin müstəqilliyini elan etməyi nəzərdə tutur.

Bəyanatda həmçinin Fransanın müxtəlif vasitələrlə Yeni Kaledoniyanı Bujival sazişi ilə şantaj etməyə çalışdığı vurğulanıb və kanak xalqının gələcəyinin saxta razılaşma ilə deyil, yalnız tam müstəqilliklə təmin olunmasının vacibliyi diqqətə çatdırılıb.