Bakıda Qadın Sahibkarlığının İnkişafı Sammiti keçirildi

Dünya Qadın Sahibkarlığı Günü münasibətlə Qadın Sahibkarlığının İnkişafı Sammiti keçirilib.

Tədbirin məqsədi ölkəmizdə qadın sahibkarlığının rolunun artmasına, yeni nəsil qadın liderlərin formalaşmasına dəstək olmaqdır.

Sammitin açılışında çıxış edən Türkiyənin Azərbaycandakı səfiri Birol Akgün Türk dünyasının sahibkarları arasında geniş əməkdaşlıq qurulduğunu qeyd edib.

Kiçik və Orta Biznesin İnkişafı Agentliyinin İdarə Heyətinin sədri Orxan Məmmədov isə həssas qrupların, eləcə də evdar qadınların özünü-məşğulluğa cəlb edilməsi məsələsinə xüsusi diqqət verildiyini bildirib.

Tədbir çərçivəsində sahibkarlıqda innovasiya, rəqəmsal transformasiya, insan kapitalının inkişafı, liderlik və qlobal trendlər mövzularında panel müzakirələr, praktik sessiyalar və şəbəkələşmə imkanları təqdim edilib. Daha sonra tədbir panel müzakirələrlə davam edib.

“Biz birlikdə daha güclüyük” şüarı altında təşkil olunan sammit iştirakçılara geniş şəbəkələşmə imkanı, müxtəlif biznes platformaları arasında yeni əməkdaşlıqların qurulmasına şərait yaradacaq.