Banklarımız “Yaşıl və dayanıqlı layihə”lər üçün nə qədər vəsait ayırıb? | Rəqəm açıqlandı

“Azərbaycanın bank sektoru “yaşıl layihə”lərə investisiyaları artıraraq ədalətli enerji keçidinə dəstəyini gücləndirib”.

Bunu COP29-un baş danışıqçısı Yalçın Rəfiyev bildirib.

“Azərbaycan bankları “yaşıl və dayanıqlı layihə”lər üçün 1,2 milyard ABŞ dolları (2 milyard manat) ayırıb. Mərkəzi Bank öz növbəsində davamlı investisiyalar üçün yeni “yaşıl taksonomiya” tətbiq edib”, – deyə o qeyd edib.

Y.Rəfiyev iqlim dəyişikliyinə dayanıqlığın artırılması üçün iqlim maliyyələşməsinə sadiqliyinə görə Kanadaya təşəkkürünü bildirib:

“Kanada hökuməti ən az inkişaf etmiş ölkələrə xüsusi diqqət yetirməklə adaptasiyanı dəstəkləmək üçün iqlim platformasına 1,5 milyard ABŞ dolları ayıracağını elan edib. 9 Kanada fondu və xeyriyyə təşkilatı növbəti onillikdə iqlim layihələrinə 290 milyon ABŞ dolları ayırmaq üçün birləşib”.

Baş danışıqçı vurğulayıb ki, COP29 sədrliyi qlobal müvəqqəti tədbirlərin həyata keçirilməsində irəliləyişə nail olmaq məqsədilə bütün maraqlı tərəfləri bir araya gətirmək üçün çalışıb.

“Prezident İlham Əliyevin COP29-da giriş nitqində dediyi kimi, nəticələrin yumşaldılması prioritetdir. Lakin çox vaxt davamlı həllər onlara ehtiyacı olan ölkələr üçün əlçatan olmur”, – o əlavə edib.